សមត្ថកិច្ច​កំពុង​តាមចាប់​ជន​ជាប់​ឃុំ​​៥នាក់ទៀត​ដែល​រត់គេច​ក្នុង​ការ​បាញ់​រំដោះខ្លួននៅ​តុលាការ​ខេត្ត​ស្វាយរៀង

ក្រោយចាប់បានជនជាប់ឃុំជនជាតិវៀតណាមម្នាក់ ពេលនេះសមត្ថកិច្ចកំពុងស្វែងរកចាប់ខ្លួនជនជាប់ឃុំចំនួន៥នាក់ និងបក្សពួកផ្សេងទៀត ដែលរំដោះខ្លួនចេញពីតុលាការខេត្តស្វាយរៀង នៅព្រឹកថ្ងៃទី១៨ ខែវិច្ឆិកានេះ។

បើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធនាគារ​នៅ​ថ្ងៃទី១៨ វិច្ឆិកា​នេះ​បានឱ្យដឹងថា ក្រោយ​ពេល​ជន​ជាប់​ឃុំ​ ៦​នាក់​បាន​រត់​គេច​ខ្លួន​ចេញ​ពី​បរិវេណ​តុលាការ​ខេត្ត​ស្វាយ​រៀង​ សមត្ថកិច្ចចាប់ខ្លួនជនជាតិវៀតណាមបានមកវិញ​០១នាក់ ឈ្មោះ ឡេ ទាំងវិនហ្លួង ភេទប្រុស និងរថយន្តមួយ​គ្រឿងដែលជាមធ្យោបាយ​ធ្វើ​ដំណើរ​សម្រាប់​រត់​គេច​ខ្លួន​ នៅវេលាម៉ោងប្រមាណ១០:៣៦នាទី។

បច្ចុប្បន្ន សមត្ថកិច្ចចម្រុះកំពុងប្រតិបត្តិការតាមចាប់ខ្លួន​ជនជាប់ឃុំចំនួន ៥នាក់ទៀតរួមទាំងបក្សពួកផ្សេងទៀតដែលមករំដោះ ជនជាប់ឃុំចេញពីតុលាការខេត្ត។

បើតាមកាមេរ៉ាសុវត្ថិភាព សមត្ថកិច្ច​បាននាំក្រុមជនជាប់ឃុំមកកាន់តុលាការខេត្តស្វាយរៀង នៅវេលាម៉ោងប្រមាណ ៨:៥៣នាទីព្រឹក បន្ទាប់មកក្រុមជនជាប់ឃុំ បានដើរចុះពីរថយន្តរបស់អគ្គនាយកដ្ឋានពន្ធធាគារខេត្តស្វាយរៀងដើរសំដៅទៅកាន់នារីម្នាក់ រួចនារី​ដែលជាបក្ខពួកម្នាក់នោះ បានដកកាំភ្លើងឱ្យក្រុមជនជាប់ឃុំ។ ពេល​នោះ​ពួកគេបានធ្វើសកម្មភាពបាញ់គំរាមលើសមត្ថកិច្ច ហើយនាំគ្នារួចឡើងរថយន្តគេចខ្លួន ក្នុងនោះសមត្ថកិច្ច​ក៏បាញ់តបតជាមួយក្រុមឧក្រិដ្ឋជនដែលទៅរំដោះអ្នកទោសផងដែរ។

លុះក្រោយមក សមត្ថកិច្ចខេត្តស្វាយរៀង​ក៏បានស្ទាក់ចាប់បានឧក្រិដ្ឋជនរំដោះអ្នកទោសចេញពីតុលាការខេត្តស្វាយរៀងបានម្នាក់ នៅ​ពេល​រថយន្តដែលធ្វើសកម្មភាពរំដោះអ្នកទោស បានបើកធ្លាក់ផ្លូវចូលប្រឡាយទឹក៕